صار النا وقت ما نقينا…عاساس بنق او من دون نق ما شي رح يتغير ..وكل شي ماشي ماشي ..بس لوين ؟ مش عارفين ..في ناس متأملين يرجع البلد ..واحسن مما كان ..وفي ناس مش متأملين بشي..والتنين مش عارفين بالحقيقة شو بدو يصير ..مجرد احساس وحالات نفسية بالاكتر ..المهم ما حدا عارف..وما حدا قادر يعرف !
صحيح انا مش خبير مالي او اقتصادي…ويمكن حتى مش خبير باي شي..لأ، يمكن خبير بشي واحد هوي كيف فيك تعيش ببلد ،ما بينعاش فيه، لمدة ستة وسبعين سنة ونكزي..الحقيقة انا مش عارف كيف وصلت لهون ..وقت كتير يا زلمي! ..يعني اصغر بتلات سنين من الاستقلال… بتسألني اي استقلال! والله معك حق ..استقلال دولة لبنان الكبير ….وبتسألني ليش كبير ؟ يعني كان زغير وكبر؟ كيف بتكبر وكيف بتزغر الاوطان؟ والله سؤال مهم ..وانا بالحقيقة ما فكرت فيه !
صحيح ..كيف بيكبر وطن من بعد ما كان زغير ؟ يعني شو يللي صار حتى كبر..وكيف كبر ؟!
هلأ فكر بالموضوع عامهلك..ولنرجع لموضوعنا
انا قلت اني مش خبير مالي او اقتصادي
بس لفت نظري امر ما بدو كتير خبرة
كيف انو بلد مفلس وشعب مشحر بيركض والليرة ، مش الدولار، بتركض ادامو…وبينام وبيفيق على حزمة ضرايب واقعة على نافوخو .. من وين بدو يلاقيها ..من دولار طالع طالع وما حدا قادر يردو او من اسعار طايرة بالعلالي وما في حدا قادر يوقفا او يقلا محلا الكحل بعينك …وبتضربوا الضرايب !
ايه ..بعد ضربتو بهالطبقة المعفنة من السياسيين ..شو بعد يهمو او يأثر فيه ضربة الدولار وضربة الاسعار ..واخر شي ضربة الضرايب !
الحقيقة..شعب صبور …وجدا
بتذكر انو احد القاب الحمار ، بعيد عنكم، هوي ابو صابر !
ما عما قول انو هالشعب حمار ..لأنو صابر ..عا كل هالوجع والجوع والفساد والخراب والانهيار الفظيع !
بس عما قول وبصريح العبارة ..انو هالشعب، وانا منو حتى ما انفهم غلط، بيستاهل يللي عما يصيبو
هوي جاب هالسياسيين ..هو ارتضى من زمان يعيش ببلد كزبي …تاريخو كزبي …ولادتو القيصرية عن يد الداية الفرنسوية كزبي …وكزبي كل شي بيصير فيه ..من انتخاب نواب الى انتخاب رئيس الى اختيار حكومة ورئيس حكومة..الى كل شي ..كزبي ومكفاية ..ونحنا عايشين جواتها ..
انا مش زعلان ..ولا قرفان ..ولا زهقان ..لاني من هالشعب وراضي بعيشتي متل هالشعب
انا ..ولا شي ..
فليش بدي ازعل او اقرف او ازهق !
انا عايش
ومتلي مخلوقات كتير عايشي ..
وما حدا احسن من حدا !
وتصبحون ..على ..ولا شي !
